Техеран, 30 септември (МИА) - Иран е подготвен за долги преговори со светските сили, изјави денеска иранскиот претседател Махмуд Ахмадинеџад.
Во Женева утре почнуваат преговорите меѓу Иран и претставници на петте постојани членки на СБ на ОН плус Германија. Дневниот ред не е прецизиран поради несогласувања.
- Сакаме пријателство и разбирање (со светските сили) и подготвени сме за долги преговори, изјави Ахмадинеџад за државната телевизија.
Претставувајќи ги преговорите како исклучителна можност за шесте држави да ја променат политиката спрема Иран, Ахмадинеџад уште еднаш ја нагласи подготвеноста на државата да соработува со светските сили во решавањето на глобалните предизвици.
Ахмадинеџад неколкупати повтори дека нуклеарното прашање ќе биде разгледувано само со МААЕ. Во меѓувреме досегашниот директор на МААЕ, Мохамед ел Барадеј изјави денеска дека Иран стои „на погрешна страна од законот“заради тоа што не соопштиле за вториот објект за збогатување уран.
- Иран е на погрешна страна на законот согласно барањето на МААЕ да биде информирана порано. Иран требаше да не информира во денот во кој решија да го изградат објектот, изјави тој.