Пекинг, 10 октомври (МИА) - Кина, Јапонија и Јужна Кореја ќе работат заедно на решавање на прашањето на нуклеарната програма на Северна Кореја, која сака подобри односи со САД, Токио и Сеул, истакна кинескиот премиер Вен Џибао на самоитот на југоисточна Азија, кој утрово се одржа во Пекинг.
Главни теми на самитот се нуклеарната програма на Северна Кореја и регионалните економски интеграции.
Вен истакна дека треба да се искористи можноста кога Пјонгјанг е подготвен да ги подобри односите не само со САД, туку и со Јапонија и Јужна Кореја, вклучувајќи и обнова на шестстраните преговори за својата нуклеарна програма, затоа што, според него, оваа можност нема долго да потрае.
Освен тоа, трите земји заинтересирани се за „развој на источноазиската заедница заснована на принципите на отвореност, транспарентност и заедништво како долгорочна цел“, се наведува во заедничкото соопштение објавено на крајот на самитот.
Во таа смисла, Кина, Јапонија и Јужна Кореја би требало да ги остават по страна своите спорови и ривалства, посебно во момент кога треба да се борат и против глобалната светска криза, климатските промени и другите глобални предизвици, се наведува во заедничкото соопштение