Пешавар, 28 октомври (МИА) - Најмалку 80 лица загинаа, а околу сто се ранети во напад со автомобил-бомба на фреквентен пазар во градот Пешавар, во северозападниот дел на Пакистан.
Повеќето од загинатите се жени и деца.
Бројот на жртвите продолжува да се зголемува, изјави Сахиб Гул, лекар во централната градска болница.
Експлозијата, која одекна во стариот дел на градот, предизвика пожар, кој ги зафати соседните згради, а неколку објекти, меѓу кои и една џамија, претрпеа сериозна материјална штета.
Нападот беше извршен неколку часа, откако американскиот државен секретар Хилари Клинтон пристигна во посета на Пакистан со ветување за нов почеток во односите.
Пакистан е во состојба на зголемена готовност, откако воената операција против талибанците и нивните сојузници во областа Јужен Вазиристан предизвика серија повратни напади во целата држава. Повеќе од 150 лица се убиени изминатите недели во нападите на екстремистите врз зградата на Обединетите нации, штаб на армијата и други објекти.
Воената офанзива почна на 17 октомври, а пакистанската армија тврди дека борбата против талибанците и бунтовниците од Ал Каеда досега е успешна.