Њујорк, 10 ноември (МИА) - Генералното собрание на ОН ги прогласи претседателските избори во Авганистан за важечки и легитимни и покрај многубројните обвинувања за масовни измами, кои ги натераа повеќемина критичари да ги оспорат резултатите.
Во едногласно поддржаната резолуција од страна на 192-членото собрание се повикува владата на реизбраниот претседател Хамид Карзаи да направи поголеми напори за постигнување владеење на правото, за развој на демократските процеси, за спречување на корупцијата и за забрзување на судските реформи.
Авганистанскиот амбасадор во ОН, Захир Танин изрази огромна благодарност од име на својата земја и владата за добиената доверба од страна на Генералното собрание. Тој призна дека за време на изборите имало проблеми, но нагласи дека не постојат идеални избори.
- Изборите беа што е можно најслободни, најчесни и најтранспарентни, оцени Танин.