Шангај, 17 ноември (МИА) - Американскиот претседател Барак Обама ја критикуваше цензурата на Интернет и слободниот говор во Кина, но емитувањето на неговите зборови во кинескиот етер беше блокирано од кинеските власти.
Обама во кинескиот град Шангај изјави дека е голем противник на цензурата.
-Прифаќам дека различни држави имаат различни традиции. Можам да ви кажам дека е факт оти граѓаните на САД имаат слободен Интернет, односно неограничениот пристап е одраз на нашата сила и мислам дека тоа треба и натаму да се охрабрува, рече Обама.
Тој додаде дека верува дека отворената дискусија, вклучувајќи ги и критиките на негова сметка, го прават „подобар лидер“, бидејќи го присилуваат да ги слуша мислењата што не сака да ги слушне.
Еден кинески блогер изјави дека транскриптот од говорот на Обама беше поставен на порталот „Netease“, но кинеските цензори го симнале за само 27 минути.
Целосниот транскрипт на кинески јазик подоцна на својот сајт го стави официјалната кинеска агенција Ксинхуа, но, според странските агенции, потребни се четири клика за да се стигне до саканиот релевантен дел.
Само локалната телевизија од Шангај директно го пренесуваше говорот на Обама, што потоа беше ставен на два популарни Интернет портали и на веб сајтот на Белата куќа.
На сајтот на кинескиот весник „Пиплс дејли“ говорот на Обама е пренесен во скратена варијанта, со акцент дека американскиот претседател говорел за „огромната моќ на Интернетот во ширењето на информациите“, без неговите коментари за цензурата.
Во Кина повеќе од 250 милиони луѓе користат Интернет, но тоа е земја со една од најсилните контроли на Интернетот во светот, попознат под името „Големиот кинески противпожарен ѕид“, поради што е честа цел на меѓународните критики.