Женева, 24 декември (МИА) - Светската здравствена организација соопшти дека, според најновите податоци, од пандемискиот грип во светот досега починаа најмалку 11.516 лица.
Ова значи дека бројот на официјално пријавени смртни случаи од новиот грип во однос на последниот извештај на СЗО е зголемен за речиси 1.000 лица, пренесуваат агенциите.
СЗО напоменува дека во Северна Америка и во западноевропските држави точката на највисока активност на вирусот Х1Н1 веќе е помината, како и тоа дека во делови од Азија се забележува намалување на ширењето на заразата.
Вирусот во САД и Канада, се уште, е географски раширен, но значително е намалена зачестеноста на болеста во форма на грип. Исто така, СЗО регистрира и пад на бројот на пациенти кои се испратени на болничко лекување, како и бројот на умрени.
На стариот континент пренесувањето на вирусот се уште е насекаде раширено, но растот на неговата активност се регистрира само во централните и источноевропските земји.