Порт-о-Пренс, 21 јануари (МИА) - Од урнатините во Порт-о-Пренс е извадено едно 11-годишно девојче, осум дена по земјотресот кој го погоди Хаити.
- Тоа е вистинско чудо, таа полека се враќа во живот. Бубрезите и работаат, и даваме инфузија од солен раствор, а полека ќе почнеме и со конкретна храна. Господ ја благословил, изјави Доминик Жан, француски хирург.
Девојчето се наоѓа во клиниката Ламбер, каде изнемоштена и изгладнета по повеќедневното гладување, ја мачат кошмари.
Спасувачките екипи продолжуваат да трагаат по преживеани под урнатините, но стравуваат дека шансите за успех се многу мали.
Досега во масовните гробници околу Порт-о-Пренс се погребани најмалку 75.000 луѓе. Се проценува дека бројот на загинатите е многу поголем, додека повредени се околу 250.000 лица, а околу милион останале без своите домови.