Техеран, 11 февруари (МИА) - Иранскиот претседател Махмуд Ахмадинеџад изјави дека на Израел треба да му се даде сериозен отпор и да се докрајчи доколку се обиде да изведе воена акција во регионот, информира денеска државната телевизија ИРИБ.
-Имаме сигурни информации... дека ционистичкиот режим се обидува да ја надомести штетата настаната по смешните порази од народите во Газа и либанскиот Хезболах, рече синоќа Ахмадинеџад во телефонскиот разговор со сирискиот претседател Башар ал Асад, алудирајќи на судирите од 2006 и 2009 година.
-Доколку ционистичкиот режим ја повтори оваа грешка и почне воена операција, тогаш треба да му се даде отпор со сите сили и да се заврши со него за сите времиња, истакна тој.
Ахмадинеџад, кој во повеќе наврати го претскажуваше неизбежниот крај на израелската држава, порача дека Иран ќе останува на страната на земјите од регионот, меѓу кои се Сирија, Либан и Палестина, пренесоа светските агенции.
Сирија, клучниот сојузник на Иран во регионот, минатата недела го обвини Израел дека го турка Блискиот исток во нова војна.
Либанскиот премиер Саад ал-Харири вчера изјави дека израелските борбени авиони секојдневно навлегуваат во либанскиот воздушен простор, што предизвикува голема напрегнатост.
Иран не го признава Израел, нарекувајќи го „ционистики режим“.
Израел, од друга страна, смета дека иранската нуклеарна програма претставува закана и не ја исклучува можноста за спроведување воена акција против Техеран доколку решението за спорот не се постигне со дипломатски средства.