Женева, 26 февруари (МИА) - Повици кон света војна, упатени од шеф на држава, се неприфатливи, изјави Сергеј Орџоникидзе, раководител на службата на ОН во Женева, пренесоа агенциите.
Реакцијата на претставникот на ОН е дадена по повод вчерашниот повик, упатен од либискиот лидер Моамер ел Гадафи, за света војна против Швајцарија.
-Сметам дека ваквите изјави, дадени од еден шеф на држава, се недозволиви во рамки на меѓународните односи, изјави Орџоникидзе.
Гадафи повика на света војна против Швајцарија заради забраната на изградбата на минариња на швајцарска територија.
Во обраќање во Бенгази по повод празникот Мулуд, кој се слави во чест на раѓањето на пророкот Мохамед, Гадафи ја нарече Швајцарија „земја на неверници и грешници“.
- Против Швајцарија, земја на неверници и грешници, кои ги уриваат домовите на Алах треба да биде објавен џихад со сите можни средства, изјави Гадафи.
На 29 ноември минатата година 57,7 отсто од Швајцарците се изјаснија на референдум против изградба на минариња во земјата.
Во меѓувреме, односите меѓу Швајцарија и Либија драстично се влошија откако во јули 2008 година во Женева беше уапсен еден од синовите на Гадафи, Ханибал, под обвинение дека ги малтретирал своите слуги.