Сантијаго, 28 февруари (МИА) - Жртвите во вчерашниот катастрофален земјотрес во Чиле веќе се 708 лица, а нивниот број може да продолжи да се зголемува, изјави претседателот на Чиле, Мишел Бачелет.
Во погодените региони од земјотресот со интензитет од 8,8 степени според Рихтер е прогласена вонредна состојба. Разурнати се куќи, патишта, има прекин на телефонските врски и електричната енергија.
Станбена зграда со околу 200 луѓе во неа се урна во Консепсион, најблискиот град до епицентарот на потресот, а според спасувачките екипи не се знае колку од нив успеале да се спасат. Во градот со 670.000 жители струјата и водата се во прекин, а многу луѓе не се враќаат во своите домови поради страв од евентуални нови потреси.
Земјотресот ја прекина работата и на две нафтени рафинерии.
Шефицата на државата изјави дека 1,5 милиони луѓе се останати без покрив над главата.
Главниот град на земјата, Сантијаго, кој се наоѓа на околу 320 километри од епицентарот, исто така е разурнат. Меѓународниот аеродром ќе биде затворен најмалку 24 часа.
Бачелет истакна дека Владата не побарала помош од други држави. Американскиот претседател Барак Обама изрази подготвеност САД да помогнат доколку е потребно, а ЕУ да испрати хуманитарна помош во вредност од три милиони евра.
Земјите со излез на Тихиот океан почнаа со евакуација на населението од крајбрежните зони, откако американските власти објавија тревога поради опасност од цунами.
Цунами бран со височина од 2,34 метри вчера погоди дел од чилеанското крајбрежје, соопшти пацифичкиот центар за предупредување од цунами. Бранот го погодил градот Талкауано и уште десет села во 6.53 по Гринич, 20 минути по силниот земјотресот. Други податоци не се соопштени.
Првиот земјотрес беше регистриран вчера во 03:34 по локално време со јачина од 8,8 степени по Рихтеровата скала, а 18 минути подоцна следуваше уште еден, со интензитет од 6,2 степени.