Сантјаго, 4 март (МИА) - Обновата на Чиле по разурнувачкиот земјотрес од саботата ќе одземе меѓу три и четири години, прогнозира денеска претседателот Мишел Бачелет, цитирана од светските агенции.
Бачелет соопшти дека, според некои пресметки, потресот нанел штети во износ од 30 милијарди долари.
-Чиле веројатно ќе се обрати кон меѓународните институции за потребите на својата обнова, забележа таа.
Бројот на жртвите од земјотресот веќе надмина 800, пренесоа агенциите. Според последните податоци на властите, во земјотресот загинаа 802 лица. Претходните пресметки говореа за 799 жртви.
Огромен дел од загинатите - приближно 600, смртта ги затекнала по крајбрежјето на јужната област Мауле, каде гигантските бранови цунами разурнаа неколку летувалишта.
Се очекува бројот на жртвите да продолжи да расте, евентуално до илјада, имајќи го предвид текот на операциите за потрага по исчезнати луѓе.
Во реонот на крајбрежниот град Конститусион, со околу 60.000 жители, најмалку 300 лица се водат како исчезнати.