Сантјаго, 6 март (МИА) - Обединетите Нации ќе испратат итна помош од 10 милиони долари за Чиле, кое минатата сабота го погоди катастрофален земјотрес, објави синоќа во Сантјаго генералниот секретар на светската организација Бан Ки-мун.
Бан рече дека ОН и Владата на Чиле ќе формираат заеднички спасувачки тимови кои ќе работат во најзагрозените подрачја.
- Во време на катастрофи ОН се фокусирани на снабдување со храна, вода и грижа за сместувањето и здравствената состојба на загрозените, рече Бан.
Генералниот секретар на ОН ја пофали чилеанската претседателка Мишел Бачелет, која јавноста ја критикуваше дека не реагирала доволно брзо после еден од најразурнувачките земјотреси што ја погоди земјата.
- Претседателката Бачелет покажа одлучност и посветеност во решавањето на последиците од оваа национална катастрофа... после еден од најсилните земјотреси во историјата, рече Бан.
Бан, кој денеска ќе го посети Консепсион, еден од градовите кои најмногу беа погодени од земјотресот, рече дека за обнова на Чиле ќе бидат потребни повеќе средства.
Чилеанските власти се уште немаат објавено проценка на штетите, но аналитичарите оценуваат дека таа изнесува меѓу 15 и 30 милијарди долари. Покрај помошта од ОН, Чиле до сега прими хуманитарна помош од 35 земји и 16 организации.