Вашингтон, 17 март (МИА) - Повеќе од 12.000 американски командоси секој ден извршуваат различни задачи на териториите на над 75 земји, изјави синоќа началникот на Командата за специјалните операции на САД, адмирал Ерик Олсон.
Тој на сослушувањето пред Комисијата за вооружените сили на Сенатот истакна дека 86 проценти од командосите војуваат во Авганистан и Ирак или дејствуваат против терористите во соседните држави. Додека околу 3.000 командоси постојано се во Европа и во Тихиот Океан.
- Нашите мисии во последните 20 години, од моментот на формирање на Командата, драстично се изменија поради брзата промена на политиката и појавата на нови закани, истакна Олсон пред сенаторите.
Администрацијата на претседателот Барак Обама за фискалната 2011 година, што почнува на 1 октомври годинава, за Командата за специјалните операции на САД побара 9,8 милијарди долари, што е трипати повеќе од средствата што Командата ги добила во 2000 година.