Виена, 8 април (МИА) - Генералниот секретар на ОН Бан Ки-мун изјави денеска во Виена дека словачкиот дипломат Јан Кубиш ќе замине како негов специјален пратеник за Киргистан, каде што по обидот за преврат власта беше преземена од опозицијата.
Кубиш ќе пристигне утре во Киргистан, истакна Бан Ки-мун.
Јан Кубиш е професионален дипломат и политичар, поранешен министер за надворешни работи на Словачка и поранешен генерален секретар на ОБСЕ.
Свој претставник во Киргистан ќе испрати и ОБСЕ, додаде генералниот секретар на ОН. Тој се сретна со новинари откако во австриската престолнина разговараше со министерот за надворешни работи на Австрија Михаел Шпинделегер.
Двајцата специјални пратеници ќе ги координираат своите дејствија.
Генералниот секретар на ОН изрази вознемиреност во врска со насилствата во Киргистан и ги повика страните кон мирно решавање на ситуацијата.