Сеул, 25 мај 2010 (МИА) - Северна Кореја се закани дека ќе преземе воени дејствија доколку Јужна Кореја продолжи да ги нарушува севернокорејските територијални води крај западното крајбрежје на полуостровот, пренесоа светските агенции.
-Ако продолжат навлегувањата на Југот во нашите територијални води, Корејската народнодемократска република ќе преземе воени мерки за да ги заштити своите води, како што веќе појасни, а Југот ќе биде сметан за целосно одговорен за сите последици што ќе произлезат од овие мерки, изјави високо позициониран севернокорејски претставник, цитиран од севернокорејските медиуми.
Воинствената реторика на Пјонгјанг предизвика загриженост на финансиските пазари и ја наметна потребата јужнокорејските власти да свикаат вонредна средба за да ги смират инвеститорите.
Недоразбирање предизвика соопштението на јужнокорејската агенција Јонхап, според која Северна Кореја се подготвува за војна. На крајот се покажа дека агенцијата се повикала на соопштение од севернокорејски извор, кое гласело само дека Северна Кореја ќе одговори на удар, доколку биде нападната.
Повеќето аналитичари се сомневаат дека некоја од двете држави е подготвена да ризикува војна, бидејќи таа би била самоубиствена за Северна Кореја и опустошувачка за јужнокорејската економија, забележаа светските агенции.