Тел Авив, 2 јуни 2010 (МИА) - Израел ослободи повеќе од 400 лица од речиси 600-те активисти од целиот свет кои патуваа со флотилата со меѓународна помош за Газа и беа држени во затвор во јужниот дел на државата, соопшти претставник на израелските затвори.
Вкупно 449 активисти синоќа го напуштиле затворот Ела кој се наоѓа во јужниот пустински град Беершеба. Меѓу нив има 123 граѓани на арапските земји, вклучувајќи ги Јордан и Кувајт, кои во текот на ноќта биле пренесувани со автобуси до пунктот Аленби на реката Јордан на границата со Јордан. Останатите биле пренесени до меѓународниот аеродром „Бен Гурион“ во близина на Тел Авив. Повеќето од нив се Турци кои биле пренесени до аеродромот, за да се качат на двата турски авиони кои ги чекале таму.
Во затворот Ела останале уште 186 активисти, но израелските власти изјавија дека работат за нивно ослободување.