Вашингтон, 27 јули 2010 (МИА) - Американскиот претседател Барак Обама изјави дека американските тајни воени документи за Авганистан, кои „истекоа“ во медиумите, не откриваат ништо ново, но ја оправдуваат неговата одлука за преразгледување на стратегијата на САД за централноазиската земја кон крајот на минатата година.
Во првата реакција на откривањето на 92-те илјади документи на Пентагон за војната во Авганистан, во кои се говори за авганистански цивили убиени по грешка и за соработка меѓу претставници на пакистанското разузнавање и талибанците, Обама изрази вознемиреност поради „истекувањето“, поради тоа што тоа може да „изложи на опасност лица или операции на теренот“.
- Тие документи сепак не откриваат ниту еден проблем, кој досега не бил споменуван во нашите дебати за Авганистан, истакна претседателот на прес-конференција во Белата куќа.
Тој додаде дека документите, кои даваат песимистичка слика за ситуацијата на теренот и го опфаќаат периодот од 2004 до 2009 година, говорат за истите тешкотии, кои го натерале да направи целосно преразгледување на политиката на САД кон Авганистан минатата есен.
Во меѓувреме Пентагон покрена криминална истрага за „истекувањето“ на тајните документи. Во текот на истрагата треба да се открие како воените документи беа објавени на сајтот Викилијкс. Истрагата е иницирана од Одделот за криминални истраги на копнените сили на САД.
Портпаролот на Пентагон, полковникот Дејв Лапан изјави дека истрагата има широк обем и оти таа не се насочена кон едно лице.