Париз, 3 август 2010 (МИА) - Пакистанскиот претседател Асиф Али Зардари предупреди дека меѓународната заедница ја губи војната против талибанците во Авганистан.
- Верувам дека меѓународната заедница, на која и припаѓа и Пакистан, е во процес да ја загуби војната против талибаните, истакна Зардари во интервју за „Монд“. - Причината поради тоа е пред се фактот што ја изгубивме битката за срцата и душите, додаде тој.
Во исто време, тој ги критикуваше сите кои се сомневаат во посветеноста на Пакистан во борбата против екстремистите, меѓу кои и Велика Британија, во која Зардари ќе престојува од денеска, па до крајот на седмицата.
Пакистанскиот лидер укажа дека сомневањето во Пакистан ги слабее меѓународните напори против терористите и екстремистите.
Британскиот премиер Дејвид Камерон, минатата седмица, во Индија изјави дека Пакистан не се залага доволно во борбата за стабилизирање на ситуацијата во Авганистан, односно во војната против тероризмот.