Вашингтон, 9 септември 2010 (МИА) - Американскиот претседател Барак Обама денеска предупреди дека планот на пасторот на протестантската црква во Флорида да ја одбележи годишнината од терористичките напади во САД со палење на Куранот е во корист на Ал Каеда и го повика Тери Џонс да се откаже од намерата.
- Тоа совршено и одговара на Ал Каеда за регрутирање. Би можело да избие жестоко насилство на места како Пакистан или Авганистан. Тоа би придонело за регрутирање на поединци кои би биле подготвени да се дигнат себе си во воздух во американските или европските градови, наведе Обама.
Пасторот оценува дека со палењето на муслиманската света книга ќе се спротивстави на исламскиот тероризам, но неговиот план наиде на критики од верските, политички и воени лидери во САД и ширум светот, тврдејќи дека тоа ќе испровоцира нови напади.
- Се надевам дека пасторот ќе сфати дека тоа што го предлага е во целосна спротивност со американските вредности, дека оваа земја е изградена на темелите на верската слобода и верската толеранција, наведе Обама.
Тој потенцира дека државата не располага со правни средства со кои би се спречил пасторот, освен локалните власти да го спречат јавното палење на Куранот.