Сеул, 30 септември 2010 (МИА) - Севернокорејскиот државен дневен весник денеска ги објави првите официјални фотографии од Ким Џонг Ун, најмладиот син и наследник на лидерот Ким Џонг Ил.
Фотографијата со група високи официјални лица на владејачката Работничка партија е објавена на насловната страница на весникот „Родонг Шинмун“, а во текстот под неа се наведени имињата на лицата, меѓу кои и Ким Џонг Ун.
Ким Џонг Ун во понеделникот стана генерал, а следниот ден на првиот конгрес на Работничката партија по 30 години е именуван за потпретседател на Централната воена комисија.
Ли Џонг Ју, портпаролот на јужнокорејското Министерство за обединување кое е задолжено за односите со Пјонгјанг, изјави дека никогаш претходно не е објавена фотографија од Ким Џонг Ун.
Неговото име за првпат е спомнато во некои од севернокорејските државни медиуми кога е објавена веста дека е унапреден во генерал со четири ѕвезди.
Информациите во државните медиуми и објавувањето на фотографии ги потврдуваат ставовите на некои аналитичари дека Ким Џонг Ун е избран за наследник на севернокорејскиот лидер, како претставник на третата генерација од ова семејство кое е на власт во земјата од 1948 година.