Осло, 8 октомври 2010 (МИА) - Кинескиот дисидент Лиу Ксиабaо е добитник на годинешната Нобелова награда за мир.
Претседателот на Норвешкиот одбор за доделување на Нобеловата награда, Торбјоерн Јагланд истакна дека Лиу „е најистакнат симбол на тешката борба за човекови права во Кина“.
- Новиот статус на Кина во светот носи и зголемена одговорност. Правата обезбедени со Уставот на Кина во пракса не функционираат за голем број граѓани, истакна Јагланд.
Педесет и четиригодишниот професор по литература и писател Лиу лани во декември беше осуден на 11-годишна затворска казна поради „противдржавни активности“. Тој, меѓу другото, бил еден од авторите на манифестот „Повелба 08“ со барања за сеопфатни политички реформи во Кина.
Манифестот заговара воведување на повеќепартиски систем и почитување на човечките и демократските права, слободата на верисповед, слободата на собирање и слободата на изразување.
Во 1989 година учествувал во протестите на плоштадот „Тиенанмен“ во Пекинг, кога исто така бил осуден на затворска казна.
Доделувањето на Нобеловата награда за мир на Лиу веќе однапред ги вознемири официјалните кинески претставници со кои Нобеловиот комитет беше во контакт, а кои притоа се заканиле со заладување на односите меѓу Кина и Норвешка.
Како што јави дописникот на МИА, годинава на списокот кандидати за Нобеловата награда за мир имаше рекордно голем број имиња, 237 поединци и организации.
Паричниот дел на Нобеловата награда годинава изнесува околу милион евра.