Сан Хозе, 12 октомври 2010 (МИА) - Спасувачите во Чиле успешно ја истестираа капсулата со која 33-цата рудари, кои од 5 август се наоѓаат заробени на длабочина од 625 метри, во среда треба да бидат извлечени на површината на земјата.
Специјално подготвениот кафез во форма на куршум, без никакви проблеми беше спуштен речиси низ целата должина на пробиениот отвор, соопшти чилеанскиот министер за рударство Лоренс Голборн.
Кога евакуацијата ќе почне, во вторник после полноќ, на спасувачите ќе им бидат потребни најмалку 48 часа за да ги извлечат рударите на светлото на површината, рече министерот.
Како што е предвидено, прво ќе бидат спуштени четворица спасувачи да им помогнат на рударите да се подготват за мачното излегување на површината, по два месеци минати под земја во рудникот за злато и бакар во пустината Атакама.