Вашингтон, 10 ноември 2010 (МИА)- Организацијата за заштита на човековите права „Амнести интернешенел“ ја повика администрацијата на Обама да почне судска истрага против поранешниот претседател Џорџ Буш помладиот, откако тој призна во своите мемоари дека одобрил при распитот на заробениците да се користи симулирано давење, пренесоа светските агенции.
-Признанието на претседателот Буш е доволно за да се активира меѓународнота обврска, што е преземена од САД, да го истражува ова признание и да преземе судска истрага, ако тоа биде докажано", изјави претставникот на „Амнести интернешенел“ Роб Фриер.
Организацијата, исто така, бара САД да почнат независна истрага за прекршување на човековите права, извршени во името на „војната против тероризмот“ за време на владеењето на Буш од јануари 2001 до јануари 2009 година.
Во вчера објавените мемоари Буш открива дека на ЦИА и одобрил да употребува симулирано давење при распит на организаторот на атентатите од 11 септември Халид Шеих Мохамед.
При симулираното давење се излева вода врз дишните патишта на човекот, кој е обесен со главата надолу врз мокра крпа, за да се предизвика чувство на задушување.
Според интерминистерската белешка на Министерството за правда на САД, која е откриена во април 2009 година, ЦИА 183 пати го подложила Халид Шеих Мохамед на симулирано давење по неговото приведување во Пакистан во 2003 година.