Минск, 23 ноември 2010 (МИА) - Русија го осуди севернокорејскиот артилериски напад врз јужнокорејскиот остров и предупреди дека има колосална опасност овие судири да прераснат во отворен конфликт, пренесоа светските агенции, цитирајќи го рускиот министер за надворешни работи Сергеј Лавров.
-Престрелката под итно треба да запре. Тоа што се случи денеска треба да биде осудено. Оние кои го почнаа сето тоа и кои го гаѓаа јужнокорејскиот остров, презедоа огромна одговорност, изјави Лавров за време на посетата на белоруската престолнина.
-За жал, тоа не е првиот ваков инцидент. Годинава такво нешто се случува по трет пат, но во двата претходни случаи стануваше збор за изолирани престрелки, додека оваа случка може да прерасне во вооружен судир, изјави Лавров.
Северна Кореја утринава гаѓаше со артилерија јужнокорејски остров. Двајца јужнокорејски војници загинаа, а десетици куќи се опожарени како резултат на артилерискиот напад.
Пјонгјанг тврди дека Сеул прв отворил оган, потсетуваат светските агенции.