Полицијата го блокираше целосно пристапот до центарот на главниот град на Тунис каде вчера имаше илјадници демонстранти. Целосно е ограбен и речиси уништен голем супермаркет во северниот дел од градот Тунис, јавуваат западни медиуми.
Привремениот претседател Мохамед Гануши изјави преку националната телевизија дека апсолутен приоритет е обновувањето на редот и мирот во државата.
Метални огради се поставени на сите улици кои водат кон центарот и не се дозволува пристап со автомобили ниту за пешаци. Мерките за безбедност се дел од вонредната состојба објавен завчера. На сила е забрана за собирање на групи луѓе, а затворени се сите продавници.
Истрели од автоматско оружје се слушаа синоќа во центарот на градот Тунис, каде беше прогласена вонредна состојба и воведен полициски час. Премиерот Гануши во директното телевизиско обраќање изјави дека претседателот Зин Ел Абидин Бен Али ја напуштил земјата и тој ја презема неговата функција.
Тој ги повика граѓаните на Тунис да ја зачуваат стабилноста и вети дека ќе управува согласно Уставот и законите на државата.
Но, и по неговото обраќање полицијата продолжи да пука по оние кои не го почитуваат полицискиот час. Западните медиуми јавија дека 13 лица се убиени во два одделни инциденти во различни квартови на главниот град.
Саудиските власти потврдија дека денеска во таа држава допатувал поранешниот туниски претседател Зин ал Абидин Бен Али и неговата сопруга.