Вашингтон, 3 февруари 2011 (МИА) - Египетскиот опозициски лидер Мохамед Ел Барадеј се обиде да ги смири стравувањата на Западот дека неговата земја може да се заврти против САД и да се спротивстави на Израел.
- Тврдењата дека откако ќе стане демократија, Египет ќе биде непријателски настроен кон САД и Израел не одговараат на вистината, истакна Барадеј за американската телевизија Си-Би-Ес.
Барадеј, кој ја доби на Нобелова награда за мир додека раководеше со Меѓународната агенција за атомска енергија (МААЕ), сега е предводник на протестите во Египет.
Тој повторно го отфрли предлогот за дијалог со египетскиот потпретседател Омар Сулејман и нагласи дека пред тоа е неопходно претседателот Хосни Мубарак да се повлече од функцијата.
- Никогаш нема да започнам дијалог додека Мубарак е на власт. Бидејќи со тоа само ќе се потврди легитимноста на режимот, која според мене веќе е изгубена, истакна опозиционерот.
Според Барадеј, тешко е да се верува дека Мубарак знае што значи демократија и е малку веројатно дека тој навистина разбира оти треба власта да ја предаде на друг.