Женева, 18 февруари 2011 (МИА) - Учесниците на антивладините протести во Либија ја презедоа контролата врз либискиот град Бејда, откако на демонстрантите им се приклучија дел од локалните полицајци, тврдат две организации на либиските емигранти во странство.
Либиската група за човекови права и солидарност соопшти дека Бејда е „во рацете на народот“, а претставник на Либискиот комитет за вистина и правда информира дека „градот е вон контрола на режимот на (либискиот лидер Моамер) Гадафи“.
Двете организации тврдат дека ваквата информација ја добиле во телефонски разговори со граѓани на Бејда, град со околу 250.000 жители.
Либиските власти засега не ги коментираа ваквите информации, а за тврдењата на двете емигрантски организации нема потврда ниту од независен извор.
Во судири меѓу антивладините демонстранти и силите за безбедност во Бејда во изминативе два дена загинаа најмалку пет лица.