Триполи, 21 февруари 2011 (МИА) - Демонстрантите во градот Бенгази во источниот дел на Либија денеска излегоа победнички на улиците откако објавија дека презвемале целосна контрола над градот.
Истовремено беа обновени протестите во главниот град Триполи каде дојде до нови судири меѓу демонстрантите и полицијата на еден од централните плоштади. Синот на либискиот лидер Муамер Гадафи и негов очекуван наследник Сеиф ал Ислам, синоќа на објави дека неговиот татко и силите за безбедност ќе се борат до последниот куршум.
Судирите избувнале доцна синоќа на Зелениот плоштад во Триполи. На покривите на околните згради биле распоредени снајперисти кои отвориле оган врз толпата.
Демонстрантите биле нападнати и од приврзаниците на режимот кои упаднале со автомобили на плоштадот и се судриле со толпата. Изутрината антивладини демонстранти ги завземале зградите на две државни телевизии. Додека над областа каде се наоѓаат полициската станица и базата на силите за безбедност се издига црн чад.
Денеска сите училишта, државни служби и повеќето трговски центри во Триполи останаа затворени.
Властите во Либија реагираа на протестите најсурово во однос на сите останати режими на Блискиот Исток и Северна Африка. Досега, според неофицијални податоци во смирувањето на немирите загинале речиси 300 лица, од кои 60 во вчерашните судири во Бенгази.
Ситуацијата се усложнува поради гласините дека демонстрантите и приврзаниците на режимот украле оружје од базите на безбедносните сили. Постои реална опасност од појава на вооружени престрелки и провокации на улиците.