Бајда, 4 март 2011 (МИА) - Лидерот на бунтовничкиот Национален либиски совет Мустафа Абдел Џалил изјави денеска дека целта на востанието во Либија е „победа или смрт“.
- Ние сме луѓе кои не се предаваат. Победа или смрт. Нема да запреме додека не ја ослободиме земјата. Помина времето на лицемерието, изјави на митинг во Бајда поранешниот министер за правда Џалил, кој го напушти режимот на Моамер Гадафи и премина на страната на востаниците.
Учесниците на митингот скандираа „Либија е слободна и Гадафи треба да си замине“.
Џалил ги предупреди востаниците дека во нивните редови можеби се инфилтрирани приврзаници на стариот режим.
- Не ги слушајте и не им дозволувајте да ја разурнат нашата револуција, истакна бунтовничкиот лидер.
Тој ги повика луѓето да не уриваат згради, кои ќе им бидат потребни кога Либија ќе стане слободна.
Ахмед Џабрил, соработник на Џалил, вчера изјави дека е можно да има преговори единствено кога Гадафи ќе поднесе оставка и ќе ја напушти Либија.