>Каиро, 9 март 2011 (МИА) - Либискиот лидер Моамер Гадафи ќе биде убиен од негов соработник, сметаат речиси две третини од испитаниците во анкета на сателитската телевизија „Ал Арабија“.
Во испитувањето на телевизијата, речиси 62 проценти од анкетираните оцениле дека актуелната криза во Либија ќе заврши со убиство на Гадафи, кое ќе го изврши некој од неговите блиски соработници.
Наспроти ова, речиси 32 отсто од испитаниците веруваат дека ќе биде постигнат договор Гадафи да ја напушти Либија, а само нешто под седум проценти сметаат дека либискиот лидер ќе им се предаде на бунтовниците.
Во интернет анкетата на „Ал Арабија“ учествувале над 29.000 лица.
Во врска со резултатите на анкетата, телевизијата ја пренесува изјавата на експертот за Блискиот Исток од лондонскиот Економски колеџ, Фуаз Џарџас, кој смета дека Гадафи е „притиснат до ѕид“ и дека „нема стратегија за повлекување“.
- Тој најверојатно ќе се бори до последниот здив, оценува Џарџас во изјавата за „Ал Арабија“.