Токио, 12 март 2011 (МИА) - Бројот на загинати и исчезнати како резултат на вчерашниот разорен земјотрес и брановите цунами во Јапонија достигна 2.500 лица, според најновите податоци на јапонската полиција.
Досега властите официјално ја потврдиле смртта на 900 лица. Бројот на исчезнати без каква било трага надмина 1.600 лица.
Има жртви меѓу учесниците во спасувачките операции. Во префектурите Мијаги, Ивате, Фукушима, кои најтешко беа погодени од катастрофата, загинале двајца полицајци. Изгубена е врската со други 55 полицајци.
Неколку села во североисточниот дел на Јапонија беа погодени од бранови цунами со височина до десет метри и се претворија во руини.
Активни спасувачки операции се уште таму не се спроведуваат поради опасност од нови силни потреси и цунами.
Најмалку 30 лица беа повредени денеска при серија нови земјотреси во префектурите Нагано и Ниигата на крајбрежјето на Јапонското Море. Силата на најмоќниот потрес беше 6,7 степени. Нема штети во нуклеарната централа во Ниигата.
Двете префектури немаат врска со североисточното крајбрежје на островот Хоншу, каде вчера се случи најсилниот земјотрес во историјата на земјата со интензитет од 8,9 степени. Експерти претпоставуваат дека тоа предизвикало сеизмичка активност и во други реони на земјата.