Токио, 14 март 2011 (МИА) - Девет лица се ранети во денешната експлозија на третиот реактор на јапонската нуклеарна централа „Фукушима 1“, од кои шестмина се војници.
Генералниот секретар на јапонската Влада Јукио Едано изјави дека како резултат на експлозијата во нуклеарната централа „Фукушима 1“ не е разурнат главниот пункт за управување на реакторот и не е регистрирана радијација.
- Според досегашните информации малку е веројатно дека може да дојде до исфрлување на големи количини на радиоактивни супстанци, додаде Едано.
Тој појасни дека експлозијата се случила поради насобраниот водород во реакторот.
Според експертите од Токиската електрична компанија експлозијата во третиот реактор била многу помоќна од експлозијата во саботата во првиот реактор, која предизвика паѓање на покрив. Третиот реактор работи со гориво од ураниум и плутониум, но како што велат експертите, според своите карактеристики не претставува голема опасност за безбедноста.