Токио, 16 март 2011 (МИА) - Нивото на радијација во реонот на јапонскиот град Китаибараки е 300 пати над нормата, соопштија регионалните власти во префектурата Ибараки.
Китаибараки се наоѓа на тихоокеанското крајбрежје на Јапонија, во централниот источен дел на островот Хоншу.
Персоналот на јапонската нуклеарка „Фукушима 1“ претходно беше евакуиран поради зголемена радијација, изјави портпаролот на Владата Јукио Едано, додавајќи оти тоа е времена мерка.
Евакуацијата беше наложена поради зголемување на радијацијата, соопшти и претставник на агенцијата за нуклеарна безбедност.
На Петтиот и Шестиот реактор сега се спроведуваат работи за преминување кон нивно активно ладење. Тие мерки се преземаат за да не се дозволи да се создаде ситуација, слична на онаа во Четвртиот реактор, рече Едано.
Претходно, на Четвртиот реактор на централата беше забележан оган, по еден час тој исчезна, но подоцна над централата беше виден бел чад.
Раководството на компанијата - оператор на централата „Токио електрик пауер“ (ТЕПКО) соопшти дека се проверуваат причините за она што се случило.