Каиро, 29 март 2011 (МИА) - Либиската државна телевизија денеска во живо емитуваше кадри на кои се гледа како маж, што многу личи на 32-годишниот Хамис, синот на полковник Моамер Гадафи, ги поздравува поддржувачите пред резиденцијата на татко му во Триполи, пренесоа светските агенции.
Според телевизијата, овие кадри ги демантираат соопштенијата во повеќе арапски медиуми за загинувањето на Хамис. Според нив, синот на Гадафи загина или при воздушните напади на западната коалиција врз Триполи или кога непријателски настроен воен пилот го урна својот авион врз резиденцијата на Гадафи во престолнината.
Хамис Гадафи е командант на елитната 32-ра тенковска бригада, сметана од многу набљудувачи за најподготвената борбена единица во Либија.