Абиџан, 5 април 2011 (МИА) - Приврзаниците на меѓународно признаениот претседател на Брегот на Слоновата Коска, Аласан Уатара синоќа ја презедоа резиденцијата на досегашниот шеф на државата Лоран Гбагбо.
Претседателската резиденција се наоѓа во источното предградие на Абиџан, Кокоди и беше една од основните цели на офанзивата на вооружените формации на Уатара.
Претходно, хеликоптери на Обединетите нации истрелаа четири ракети врз воен камп на Гбагбо. Во кампот Акуедо, во главниот град Абиџан сместени се три баталјони на армијата на Брегот на Слоновата Коска.
Од канцеларијата на францускиот претседател Никола Саркози соопштено е дека француската армија учествувала во операцијата врз кампот Акуедо со цел да се заштитат цивилите од насилството меѓу приврзаниците на Гбагбо и Уатара.
Приближно 12.000 државјани на Франција живеат во нејзината поранешна колонија.