Триполи, 6 април 2011 (MИА) - Лидерот на либиските бунтовници Абдел Фатах Јунис ги обвини НАТО дека реагираат многу доцна истакнувајќи дека ако Алијансата не ја врши работата како што треба, ќе покрене прашање пред Советот за безбедност на ОН.
Јунис говореше на прес конференција во Бенгази. Според него однесувањето на НАТО и дава можност на армијата на Гадафи да напредуваат секој ден и да убиваат цивили во Мисрата.
- НАТО дејствуваат доцна и им дозволуваат на силите на Гадафи да напредуваат. НАТО се претвори во проблем за нас, изјави тој.
Американскиот дипломат Крис Стивенс пристигна во Бенгази каде почна разговори со претставници на Преодниот национален совет на Либија. Тема на разговорите се хуманитарна помош и демократските аспирации на опозицијата која бара оставка од Гадафи. Тој треба да воспостави тесни контакти со опозицијата во Либија во момент кога САД разгледуваат можност да ја признаат опозицијата како легитимен соговорник. Франција, Катар и Италија веќе го признаа Советот.