Вашингтон, 3 мај 2011 (МИА) - На најниско ниво во последната декада опадна бројот на луѓето во светот со пристап до слободни и независни медиуми, се наведува во извештајот на „
Фридом хаус“, објавен по повод 3 Мај, Светскиот ден на слободата на медиумите.
Во извештајот „
Слобода на печатот 2011: Глобална анкета за медиумите“ се наведуваат повеќе земји каде има забележително опаѓање на слободата на медиумите, меѓу кои, Египет, Хондурас, Унгарија, Мексико, Јужна Кореја, Тајланд, Турција и Украина.
Од 196 земји и територии оценувани во 2010, 68 односно 35 отсто се рангирани како слободни, 65 односно 33 отсто како делумно слободни, а 63 односно 32 отсто како неслободни.
Македонија и годинава е позиционирана во делумно слободните и на листата на „Фридом хаус“ го дели 96 место со БиХ. Од балканските земји Словенија е на 48. место, Грција е 65., Србија 72., Бугарија 77., Црна Гора 80., а Хрватска 85-та. Албанија е позиционирана на 102., Косово на 104, а Турција на 112 место.
Најслободни се медиумите во Финска, Норвешка и Шведска, а новинарската слобода е најограничена во Бурма, Еритреја, Либија, Узбекистан, Туркменистан и Северна Кореја.