Вашингтон, 6 мај 2011 (МИА) - Терористичката организација Ал Каеда ја потврди смртта на својот лидер Осама бин Ладен, со соопштението што денеска го стави на исламистичките Интернет форуми и се заколна дека ќе го одмазди неговото убиство.
- Ние од организацијата Ал Каеда му ветуваме на семоќниот Алах и ја бараме неговата помош, поддршка и истрајност да продолжиме по патот на џихадот, патот по кој одеа нашите лидери, а пред сите Шеикот Осама, се наведува во соопштението за кое информира американската служба за следење на вебсајтови СИТЕ, јавија светските агенции.
-Нагласуваме дека крвта на борецот Шеик Осама бин Ладен, за нас и за сите муслимани е многу драгоцена за да биде напразно пролеана, се истакнува во соопштението на Ал Каеда.
Организацијата ги повика сите муслимани во Пакистан да се кренат против своите лидери „ и земјата да ја исчистат од срамот што им го нанесе група издајници и крадци кои се му продадоа на непријателот“ и од „валканите Американци кои во неа ја шират корупцијата“.
Соопштението на Ал Каеда, со датум од 3 мај, е првото на оваа организација објавено по смртта на Бин Ладен, а неговата автентичност за сега не е независно потврдена, наведуваат агенциите.
Ал Каеда, исто така, наведе дека наскоро ќе биде објавена аудио снимка на убиениот лидер, направена еден недела пред неговата смрт.