Анкара, 8 јуни 2011 (МИА) - Турскиот премиер Реџеп Таип Ердоган изјави дека Турција нема „да ја затвори вратата“ за бегалците кои бегаат од нередите во Сирија и апелираше на властите во Дамаск да покажат поголема толерантност кон граѓаните по најновите немири на северозападот на земјата.
Коментирајќи ги извештаите дека над 120 Сиријци ја преминале границата со Турција во текот на ноќта, Ердоган рече дека Анката со загриженост ги следи настаните во Сирија.
Споменатите Сиријци побегнаа од градот Јисир Ал-Шугор стравувајќи од крвопролевање во момент кога властите испратија тенкови со наредба да пукаат откако претходно соопштија дека оружени банди убиле повеќе безбедносни припадници.
- Сирија треба да го измени однесувањето кон цивилите и да заземе потолерантен став што е можно поскоро, изјави Ердоган.