Пекинг, 7 јули 2011 (МИА) - Висок кинески дипломат се сретнал со лидерот на либискиот Преоден национален совет во Бенгази, јавија денеска кинеските државни медиуми.
Посетата на Чен Содун, директор на одделот за Северна Африка во кинеското Министерство за надворешни работи, е втора официјална средба меѓу Кина и либиската опозиција за помалку од еден месец. Кон крајот на јуни лидерот на Преодниот национален совет Махмуд Џибрил беше во посета на Пекинг.
Чен на средбата со заменикот претседател на Советот Али Есауи, изјавил дека Кина го смета Преодниот национален совет за значаен партнер за дијалог.
Кина никогаш не одржувала блиски односи со режимот на либискиот лидер Моамер Гадафи. На почетокот на јуни во Пекинг гостуваше либискиот министер за надворешни работи Абдел Ати ал Обеиди. Но, благонаклонетоста кон либиските бунтовници, според политичките аналитичари, е знак на промена на политиката на Пекинг, кој по правило избегнува да се меша во внатрешната политика на други држави.