Триполи, 7 јули 2011 (МИА) - Либиските бунтовници бележат успеси во офанзивата околу Триполи и се повеќе напредуваат кон главниот град на земјата, додека во исто време силите на НАТО ги интензивираат нападите врз трупите на либискиот лидер Моамер Гадафи.
Според западните медиуми, бунтовниците потпомогнати од доставата на оружје од Франција и воздушните напади на силите на НАТО успеале да го освојат селото Гуалиш, на околу 50 километри јужно од Триполи и заробиле поголем број платеници од Гана и Мали, кои се борат на страната на војската на Гадафи.
Еден од бунтовничките команданти изјави дека неговите сили ги координирале своите акции со бомбардирањата на НАТО и во текот на минатата недела ги интензивирале нападите врз трупите на Гадафи.
Меѓутоа, заменик-министерот за надворешни работи на Либија Халед Каим ги демантираше информациите дека бунтовниците го зазеле Гуалиш. Тој ги обвини силите на НАТО дека ги интензивирале воздушните напади во пресрет на бунтовничката офанзива на Гуалиш, која, според него, е спречена и бунтовниците се потиснати.
Според извори во редовите на бунтовниците, бунтовничките сили се насочиле кон гарнизонот Гарјан, кој претставува стратешки важно упориште на владините трупи во реонот на планината Нафус, југозападно од Триполи.