Сирт, 22 јули 2011 (МИА) - Либискиот лидер Моамер Гадафи исклучува секакви преговори со бунтовниците за иднината на северноафриканската држава, пренесоа светските агенции.
-Нема да зборувам со нив. Нема да има никакви преговори меѓу мене и нив до Денот на страшниот суд, изјави Гадафи во обраќањето кон учесниците на митингот за негова поддршка во неговиот роден град Сирт, источно од престолнината Триполи.
Странските новинари беа поканети во официјална посета на Сирт од страна на либиската влада, забележуваат агенциите.
Либискиот народ „ќе победи во судирите, а силите на НАТО ќе бидат победени и ќе се вратат со празни раце, додаде Гадафи, цитиран од француските медиуми.
Либискиот лидер упати предупредување кон бунтовниците, кои контролираат неколку региони во земјата: „Народните маси ќе тргнат против вас и ќе ве столчат“.
Во друг говор, емитуван на либиската телевизија, полковникот Гадафи ги повика лидерите на племињата во Мисрата да си ја повратат контролата врз градот, што долго време е во рацете на бунтовниците.
Преговори со режимот на Гадафи нема да има, додека тој не се откаже од власта, изјави претседателот на либискиот Преоден национален совет Махмуд Џибрил по средбата во Мадрид со шпанската министерка за надворешни работи Тринидад Хименес, пренесоа агенциите.
Џибрил подвлече дека либиските бунтовници ќе ја продолжат вооружената борба против диктаторскиот режим.
Хименес ја истакна неопходноста Гадафи да се отстрани од власта, што ќе значи почеток на процесот на демократски промени во Либија. Таа подвлече дека Гадафи во моментов е во изолација и дека вршењето политички, економски и воен притисок врз режимот ќе продолжи истовремено со полагањето на темелите на идната демократска Либија.