Каиро, 3 август 2011 (МИА) - Во Каиро денеска почна судењето на поранешниот египетски претседател Хосни Мубарак и блиските соработници, меѓу кои и неговите двајца синови.
Обвинетите пред судот се изјаснија дека не се виновни ниту по една точка од обвинението. Мубарак е обвинет за убиство на демонстранти за време на бунтот против него на почетокот на годинава, за профитирање со злоупотреба на положбата и за извоз на плин за Израел по цена пониска од онаа на меѓународниот пазар. Неговите синови се обвинети за профитирање користејќи го влијанието на нивниот татко, и за тоа би можеле да добијат казни затвор од пет до 15 години. Обвинети се и министерот за внатрешни работи Хабиб ал-Адли и шестмина државни функционери.
Појавувањето на Мубарак во судницата во болнички кревет предизвика различни реакции, од оние кои го сожалуваат до толкувања дека тоа претставува евтин трик за да предизвика жал и симпатии кај народот. Јавноста денеска имаше можност првпат да го види Мубарак по 10 февруари, еден ден пред неговото заминување од власт.
Судењето го пренесува египетската државна телевизија, а пред зградата на Полициската академија, каде се одржува процесот, се судрија стотина противници и приврзаници на режимот на Мубарак, додека стотина полицајци се обидуваат да ја раздвојат разбеснетата толпа.
Судскиот процес се одржува под силно обезбедување од дури 3.000 полицајци.
Поранешниот долгогодишен египетски претседател би можел да биде осуден на смртна казна доколку биде прогласен за виновен. Адвокатот на Мубарак предупреди дека нековиот клиент е во тешка здравствена состојба.
Хосни Мубарак поднесе оставка на 11 февруари, по 18 денови бурни протести на каирскиот плоштад Тахрир, за време на кои се убиени околу 850 луѓе.