Бенгази, 25 август 2011 (МИА) - Либиските бунтовници за малку не успеале да го фатат полковникот Моамер Гадафи кога вчера упаднале во една куќа во Триполи, каде наводно се криел, објави денеска францускиот магазин „Пари мач“.
Весникот се повикува на извори во единицата задолжена за координација на разузнавачките служби на арапските земји и либиските бунтовници. Според весникот, разузнавачките служби веруваат дека Гадафи се наоѓа некаде во главниот град на Либија.
Бунтовниците, вчера околу 10 часот по добиени анонимни информации упаднале во приватна куќа во централниот дел на Триполи, но Гадафи веќе бил заминат.
Сепак, пронајдени се докази дека Гадафи поминал барем една ноќ во куќата.
Истовремено, продолжуваат борбите меѓу бунтовниците и силите лојални на Гадафи во областа на Сирт, родното место на либискиот лидер Моамер Гадафи.
Сирт, кој се наоѓа на 450 километри источно од Триполи, е опколен од две страни од бунтовничките сили.
Портпаролот на бунтовниците Мухамед Завави изрази надеж дека противниците ќе прифатат доброволно да се предадат или повлечат, но силите лојални на Гадафи објавија дека ќе продолжат со борбите до самиот крај.
Градот Сирт се смета за една од можните локации на кои се крие Гадафи.
Во градот со околу 100.000 жители, од кои мнозинството се од неговото племе, со денови нема електрична енергија и телефонски врски, а има и недостиг на вода.