Триполи, 31 август 2011 (МИА) - Либискиот Преоден национален совет денеска соопшти дека Моамер Гадафи „речиси сигурно“ се наоѓа во Либија и дека бунтовниците имаат право да го убијат доколку не се предаде.
- Ова е информација со која располагам, Гадафи е, тврдам со 80 проценти сигурност во Либија, изјави Омар Харири, кој е задолжен за воени прашања во либискиот бунтовнички Совет.
Според Харири бунтовниците веруваат дека Гадафи се крие или во Бан Валиду, југоисточно до Триполи или во некое предградие на главниот град.
Претходно, еден од истакнатите членови на Преодниот национален совет Али Тархуни соопшти дека бунтовниците знаат каде се крие Гадафи, но не изнесе никакви детали.
Бунтовниците даваат 1,2 милиони евра за главата на Гадафи, жив или мртов, иако соопштија дека ќе му обезбедат фер судење во Либија.