Вашингтон, 3 септември 2011 (МИА) - Постојат информации во владина зграда во Триполи за тесни врски во минатото меѓу ЦИА и разузнавачките служби на режимот на Моамер Гадафи, објави Волстрит џурнал.
Британскиот Индипендент исто така објави информација за врски во минатото меѓу британското и либиското разузнавање.
За време на мандатот на Џорџ Буш, ЦИА предале осомничени терористи на режимот на Гадафи, наведува весникот цитирајќи документи кои се откриени во централата на либиското разузнавање. Во тоа време либиските разузнавачки служби ги раководел Муса Куса - од 1994 до 2009 година, а потоа тој беше министер за надворешни работи.
Куса избега од режимот на Триполи и замина во Лондон на 30 март.
Во 2004 година, ЦИА имала „постојано присуство“ во Либија се вели во документите и тоа, според американски официјален претставник, било поради обидите на Либија да излезе од дипломатска изолација наметната од Запад.
- Во 2004 година, САД успеаја да ја убедат либиската Влада да прекине со програмата за нуклеарно оружје и да помогне во апсење терористи кои се подготвувале за напади врз американски интереси, вели извор кој побарал анонимност. Архивските документи биле откриени од претставници на Хјуман рајтс воч кои дале копии до весникот.