Каракас, 5 септември 2011 (МИА) - Венецуелскиот претседател Уго Чавес го повика денеска поранешниот либиски лидер Моамер Гадафи да „издржи“, верувајќи дека тој нема да ја напушти земјата.
- Никој не знае каде е Гадафи, но сигурен сум дека не размислува за напуштање на Либија, изјави Чавес.
Либиските бунтовници се заканија дека ќе го нападнат Бани Валид, упориштето на силите лојални на Гадафи, каде, како што се верува, се крие барем еден од синовите на поранешниот либиски лидер. Гадафи не е виден откако бунтовниците на 20 август го зазедоа Триполи, иако минатата недела беа емитувани аудио снимки во кои тој ги повика своите приврзаници за герилска војна.
- Тој треба да издржи и се надевам дека таа истрајност ќе му помогне да најде пат кон мирот и да ги победи оние кои сакаат војна, нагласи венецуелскиот претседател.
Тој денеска ги повика новите економски сили на т.н. БРИК (Бразил, Русија, Индија и Кина), левичарските влади во Латинска Америка и африканските држави за ги здружат силите и да ја спречат „варварската“ кампања на НАТО во Либија.