Разузнавачката служба на чешката Армија, според Годишниот извештај од 2010, помогнала да биде пронајден водачот на терористичката мрежа Ал Каеда, Осама бин Ладен, кој беше убиен во мај годинава во Пакистан.
Во Информацијата стои дека чешките разузнавачи на сојузничките сили им доставиле информација за движењето на познати терористи, јави дописникот на МИА од Прага.
- Военото разузнавање во 2010 година од сопствени извори дојде до информации за движењето и локацијата на познати терористи кои аналитички беа карактеризирани како релевантни. Информациите беа предадени на партнерските разузнавачки служби и можно е во крајниот резултат да придонеле за апсењето на најбараните терористи во светот, се вели во Извештајот.
Осама бин Ладен, познат како водач на милитантното исламистичко движење, Ал Каеда, беше убиен на 2 мај 2011 година во акција на специјални американски командоси во близина на на пакистанската метропола Исламабад.
Се верува дека тој ги смислил, поттикнал и активно учествувал во нападите на 11 септември, 2001 во Њујорк и Вашингтон во кои загинаа најмалку 2.998 лица.