Сана, 26 септември 2011 (МИА) - Јеменскиот претседател Али Абдула Салех повика на предвремени избори во своето прво обраќање кон нацијата по неговото враќање од лекување во Саудиска Арабија, без да вети итно повлекување од власта, што нема да им се допадне на неговите противници.
- Треба сите да преминеме на дијалогот, разбирањето и мирната смена на власта преку избори, предвремени претседателски избори, рече тој во телевизиското обраќање.
Салех додаде дека ја поддржува иницијативата на земјите од Персискиот залив, која предвидува тој да се откаже од власта во замена за имунитет.
- Меѓутоа, сакам да додадам дека оваа иницијатива за смена на власта ќе се случи со избори и притоа тоа ќе биде на секое ниво - претседателски, парламентарни и локални, се разбира, доколку постигнеме согласност, посочи тој.
Изјавата на Салех може уште повеќе да ја вжешти ситуацијата во земјата, каде во последните шест дена во насилството имаше над 100 нови жртви.
Јеменците стравуваат дека во нивната земја може да дојде до сеопшта граѓанска војна, доколку Салех остане на власт.
Демонстрантите, кои неговиот телевизиски говор го следеа од шаторите на централниот Плоштад на промената во Сана, коментираа дека нема ништо ново во изјавата на Салех.