Вашингтон, 27 септември 2011 (МИА) - САД соопштија дека се подготвени да соработуваат со следниот претседател на Русија, кој и да е, откако премиерот Владимир Путин објави дека планира да се врати на местото шеф на државата.
Рускиот претседател Дмитриј Медведев, кој ја наследи функцијата од Путин во 2008 година соопшти дека се согласува по изборот во март следната година да биде на чело на владата.
- Очекуваме соработка со било кој следен претседател на Русија, бидејќи искрено веруваме дека тоа е од меѓусебен интерес на САД, Русија и целиот свет, истакна синоќа портпаролот на Стејт департментот Марк Тонер.
Тој нагласи дека САД оценуваат дека враќањето на Путин на претседателската функција не може да ја загрози идната соработка меѓу двете држави.
- Ќе продолжиме да работиме на унапредување на односите и мислиме дека досега тоа беше корисно. Очигледно, Путин од својата сегашна позиција беше дел од тие разговори и соработката. Но, повторувам, за тоа треба да одлучи рускиот народ, посочи Тонер.